لو بتفكر تاخد كورس فى شىء جديد يبقى معلش خد من وقتك دقايق و اقرا الكلام دا

 

خلاصه السطور اللى تحت … 90% من التريننج سنتر فى مصر نصابين

 .لو شايف انك استحاله تقتنع بالسطر دا يبقى متضيعش وقتك فى السطور اللى تحت 

التسلسل الطبيعى لاى انسان عايز يتعلم شىء جديد ان هو ياخد تدريب فى المجال دا .. و بالتالى هيبدا عمليه البحث عن تريننج سنتر و لما هتبدأ البحث هتجد كتير من التريننج سنتر سواء فى ال اى تى او اللغات او السوفت سكيلز .. لكن السؤال هنا ياترى كل التريننج سنتر مؤهلين ان هما يقدموا الكورسات دى ؟؟؟

الحقيقه اللى لقيتها فى مصر و الدول العربيه من خلال عملى كمدرب و كمتدرب – دا رأى شخصى – ان اكتر من 90% من التريننج سنتر نصابين .. ايوا بالظبط زى ما حضرتك قريت نصابيييين … و غير مؤهلين ان يشرحوا غالبيه الكورسات اللى بيعلنوا عنها و بيكون العجز الاكبر من ناحيه المدربين اللى بيقدوا الكورسات … ممكن تكون حضرتك دلوقتى مختلف معايا فى الكلام اللى فوق لكن هوضح ليك طريقه عمل الترييننج سنتر اللى ينطبق عليها مسمى النصابين ..

الموضوع بكل بساطه ان التريينج سنتر عايز يكسب – و دا حقه الطبيعى – فبتكون معادلته كاى مشروع يهدف للربح ان هو يقلل المصاريف و يزود الدخل

فعلشان يحقق المعادله دى لازم يقلل المصاريف باكبر قدر ممكن فبيكون الحل الاسهل بالنسبه للتريينج سنتر ان هو يبحث عن مدرب للكورس مرتبه قليل جدا علشان يقلل المصاريف و فى نفس الوقت يحاول يبيع الكورس باكبر سعر للمدرب فيعمل صافى ربح محترم .. طبعا مع كثرة التريننج سنتر فى خلال السنوات اللى فاتت الكورسات بقت اسعارها رخيصه جدا فبالتالى الترييننج سنتر لازم يقلل هو كمان سعر الكورس بتكون النتيجه ان هو ملزم يقلل فى راتب المدرب فتكون النتيجه ان هو ميقدرش يجيب مدرب محترف صاحب خبره فعليه علشان المعادله تفضل منطقيه … فبتالى حضرتك تاخد الكورس تلاقى مدرب ممكن يكون اول مرة يشرح الكورس و هو اصلا كان واخد الكورس فى مكان تعبان برضو فالنتيجه بتكون صفر

و حضرتك متوقع انك فى احسن تريننج سنتر فى العالم – هما بيوصلو ليك كدا – و معاك افضل مدرب اللى بيديك كلام محدش يعرفه و انت متوقع انك لما تخلص الكورس و مع اول انترفيو ال اتش ار هياخدوك بالحضن لكن تتفاجىء بالحقيقه المرة و تحس انك دارس سى شارب و هما بيسالوك فى فوتو شوب ..

ملاحظه : فى ترييننج سنتر بتعمل دعايه لكورسات عندها او تتفق مع عميل على كورس و هى معندهاش مدرب فى  الكورس دا … لان التريينج سنتر شايف ان اسهل شىء ممكن ايجاده فى المعادله هو المدرب

 

طيب و الخلاصه علشان متقعش فى فخ التريتتج سنتر و يضيع عليك فلوسك و وقتك بدون اى فايده

 :للاجابه على السؤال دا انت امامك حل من اتنين
الحل الاول : لو انت حابب انك تاخد الكورس فى تريننج سنتر

فى الحاله دى لازم تعمل الخطوات دى

:الخطوة الاولى  

.استفاد من خبره اللى سبقوك فى البحث عن تريننج سنتر محترف و محترم و عايز يحافظ على العميل- لازم يكون عنتجربه شخصيه-  و بلاش جو الخصومات و العروض و خد كورس و التانى هديه

:الخطوة الثانيه

.. لما تستقر على ترييننج سنتر شوف مين المدربين اللى فيه حاليا و اسال على المدرب اللى هيشرح ليك الكورس 

و دى اهم خطوة لان فى مشكله كبيرة بتحصل لان ممكن اللى جرب الترييننج سنتر دا بشكل شخصى و قالك ان فيه مدربين محترفين يكون المدربين دول سابو المكان ..لان مفيش مدرب بيستمر فى نفس المكان سنين كتير …  فممكن تروح تلاقى مدرب جديد و مستواه اقل من اللى انت متوقعه ..

فبتالى اسأل على اسم المدرب اللى هيديك الكورس و لازم تعرف اسمه و من حقك تقولهم ابعتولى السى فى بتاعه على الميل و اسأل عنه و شوف لو حد جربه و مستواه ايه بالظبط اعمل الظبط اكنك رايح تخطب لان الكورسات زى الخطوبه فى الاخر هتخسر فلوس و وقت .

:الخطوة الثالثه

… متروحش تاخد كورس متعرفش عنه حاجه .. على الاقل تبقى فاهم العناصر الاساسيه للكورس و تبقى محدد لنفسك انت محتاج تفهم ايه بالظبط و ايه اللى محتاج تركز عليه علشان تستفاد من المدرب بشكل صح.

الحل الثاني : لو انت مش عايز تاخد الكورس فى ترييننج سنتر

فى الحاله دى مش عايز تاخد الكورس فى ترييننج سنتر لكن انت عايز تتعامل مع المدرب مباشر .

و هنا انت هتحتاج الخطوة الثانيه و الثالثه من الحل الاول

يعنى ابحث عن مدرب خبره و محترف حد جربه و تواصل معاه و يشرح ليك الكورس لوحدك (لكن دا هيكون مكلف ) او تتفق مع مجموعه من الشباب زيك محتاجين نفس الكورس .

و زى الحاله  الاولى متدخلش كورس معندكش فكرة عن محتواه لازم تاخد فكرة الاول
و بوجه عام يعتبر كل الكورسات ليها شرح على النت يعنى  اتفرج على اى شرح قبل ما تروح الكورس دا هيخليك تستفاد من الكورس بشكل تانى خالص .

 

 ..دا كان رأيى الشخصى فى التعامل مع الترييننج سنتر فى مصر و الدول العربيه

و بالتوفيق للجميع ان شاء الله

4-1-2015

ITSaurus 

 

 

 

Advertisements